Tamil Ani Ilakkanam - 14 Types Full Collection தமிழ் அணி இலக்கணம்: 14 முக்கிய வகைகள் வழங்குபவர்: இரா.செந்தில்குமார், B.T.ASST., காப்பரத்தாம்பட்டி 1. உவமை அணி 6-ஆம் வகுப்பு ஒரு பொருளை மற்றொரு பொருளுடன் ஒப்புமைப்படுத்தி, அவற்றுக்கிடையே 'போல, புரைய, அன்ன' போன்ற உவம உருபுகள் வெளிப்படையாக வருவது. "அகழ்வாரைத் தாங்கும் நிலம்போலத் தம்மை இகழ்வார் பொறுத்தல் தலை." விளக்கம்: பூமி தன்னைத் தோண்டுபவரைப் பொறுத்துக் கொள்வது போல , நாமும் இகழ்வாரைப் பொறுக்க வேண்டும். 2. எடுத்துக்காட்டு உவமை அணி 7-ஆம் வகுப்பு உவமை ஒரு தொடராகவும், உவமேயம் ஒரு தொடராகவும் வந்து, அவற்றுக்கிடையே உவம உருபு மறைந்து வருவது. "தொட்டனைத் தூறும் மணற்கேணி மாந்தர்க்குக் கற்றனைத் தூறும் அறிவு." விளக்கம்: மணற்கேணியைத் தோண்டும் அளவிற்கு நீர் சுரக்கும்; அதுபோலக் கற்கும் அளவிற்கு அறிவு வளரும். இதில் 'அதுபோல' என்ற உருபு மறைந்து வந்துள்ளது. 3. உருவக அணி...
Comments
Post a Comment